Home > अर्थ > नारायणहिटी सङ्ग्रहालयबाट २३ करोड राजश्व संकलन

नारायणहिटी सङ्ग्रहालयबाट २३ करोड राजश्व संकलन

वैशाख २, नारायणहिटी दरबार सङ्ग्रहालय सर्वसाधारणलाई अवलोकनका लागि खुला भएको नौ वर्षमा २७ लाख ३१ हजार ४ सय ८५ जनाले अवलोकन गरिसकेका छन् ।

विसं २०६५ जेठ १५ मा गणतन्त्र स्थापना भएपछि सोही वर्षको फागुन १६ गतेदेखि सर्वसाधारणलाई नारायणहिटी दरबार अवलोकनका लागि खुला गरिएको थियो ।

नेपाली विद्यार्थी ११ लाख ४५ हजार ५ सय १०, नेपाली सर्वसाधारण १३ लाख ६५ हजार ९१, चीनसहित सार्क मुलुकका एक लाख ५५ हजार ५ सय ७६ र अन्य मुलुकबाट ६५ हजारले ३ सय ८ अवलोकन गरेका छन् । यसबाट रु २३ करोड २४ लाख ५१ हजार ५ सय ५ राजश्व संकलन भएको छ ।

टिकट बिक्रीबाट रु २३ करोड नौ लाख ६७ हजार ३ सय र सवारी साधन पार्किङबाट रु १४ लाख ८४ हजार २ सय ५ आम्दानी भएको सङ्ग्रहालयका सूचना अधिकारी अद्धैत श्रेष्ठले जानकारी दिए ।

‘नेपाली विद्यार्थीलाई २०, नेपाली सर्वसाधारणलाई रु १००, चीनसहित सार्क मुलुकका दर्शकलाई २ सय ५० र अन्य मुलुकका दर्शकलाई ५ सय लिँदै आएका छौँ ।’ उनले भने ।

चालू आर्थिक वर्षको चैत मसान्तसम्म मात्र दुई लाख ३५ हजार ५३४ दर्शकले सङ्ग्रहालय अवलोकन गरेकामा ८७ हजार ९१८ विद्यार्थी, एक लाख २८ हजार ६२ सर्वसाधारण, १३ हजार २१३ चीनसहित सार्क मुलुकका दर्शक र छ हजार ३४१ अन्य मुलुकका दर्शक रहेका छन् ।

यो वर्षमात्र रु २१ लाख तीन हजार ८ सय ३१ राजश्व संकलन भएको छ । यस्तै आठ हजार ३ सय ९२ सवारी पार्किङबाट रु एक लाख ३५ हजार ८ सय ७५ संकलन भएको छ ।

सङ्ग्रहालयले मोटरसाइकल पार्किङका लागि रु १०, कार र जिपका लागि रु २५ र माइक्रो, भ्यान, मिनीबस र बसका लागि रु ५० दस्तुर लिदै आएको छ ।

मंगलबार र बुधबारबाहेक पाँच दिन सर्वसाधारणका लागि खुला गरिने सङ्ग्रहालय दिनको ११ देखि ३ बजेसम्म अवलोकन गर्न पाइने व्यवस्था गरिएको छ ।

सङ्ग्रहालयभित्र विभिन्न बैठक कोठा, राजारानीको शयन कक्ष, राजकीय पाहुनाले प्रयोग गर्ने शयन कक्ष, भान्छा कोठा, भोजन कोठा आदि गरी ५२ कोठा छन् । विभिन्न जिल्लाका नाममा निर्माण गरिएका १९ कक्षलाई पनि प्रदर्शनीमा राखिएको छ ।

नारायणहिटी दरबार सङ्ग्रहालयका कार्यालय प्रमुख रोहितकुमार ढुंगाना सङ्ग्रहालयलाई थप व्यवस्थित बनाउन सके दर्शकको संख्या वृद्धि हुने बताउँछन् । ‘विभिन्न कारणले दरबारभित्र रहेको श्रीपेचलगायतका सामग्री देखाउन सकिएको छैन, यस्ता वस्तुलाई समेत अवलोकनमा राख्न सके थप दर्शक भित्र्याउन सकिन्छ’, उनले भने ।

सङ्ग्रहालय घुम्न आउने दर्शकका लागि महानगरीय प्रहरी नारायणहिटी गारद गुल्मले सुरक्षा दिइरहेको छ । सङ्ग्रहालयभित्र झोला, क्यामरा, खानेकुरा लैजान तथा फोटो खिच्न मनाही गरिएको छ ।

गुल्मकी प्रमुख पूर्णिमा चन्दले दैनिक एक हजारदेखि तीन हजार दर्शकलाई जाँच गरेर सङ्ग्रहालयको अवलोकनका लागि पठाउने गरेको बताउँछिन् । ‘बिदाको दिनमा अलि धेरै दर्शक अवलोकनमा आउने गरेका छन्’, उनले भनिन् ।


Comments