नेपाल दोश्रो जितको खोजीमा आज ओमान संग खेल्दै

माघ २६, नामिवियामा जारी आईसीसी विश्व क्रिकेट लिग डिभिजन टु क्रिकेट अन्तर्गत नेपालले दोस्रो खेलमा आज (शुक्रबार) ओमानसँग प्रतिस्पर्धा गर्दैछ । बिहीबार भएको पहिलो खेलमा आयोजक नामिवियालाई पराजित गरेको नेपालले दोस्रो खेलमा ओमानसँग खेल्न लागेको हो ।

विन्डहुकस्थित अफिस पार्कमा हुने नेपाल र ओमानबीचको खेल नेपाली समयअनुसार दिउँसो सवा १ बजे सुरु हुनेछ । पहिलो खेलमा जित निकालेको नेपाली टोली ओमानलाई हराउँदै दोस्रो जितको खोजीमा रहेको छ । यता, ओमान भने पहिलो जितको खोजीमा छ ।

रोमान्चक बनेको पहिलो खेलमा नेपालले नामिवियालाई १ विकेटले हराएको थियो । बसन्त रेग्मी नायक बन्दा नेपालले नामिवियाले दिएको १३९ रनको लक्ष्य ४९ ओभर २ बलमा ९ विकेट गुमाएर पूरा गरेको थियो । एक समय पराजय नजिक पुगेको नेपालको जितमा बसन्तले अविजित २४ रन जोड्दै नेपाललाई महत्वपूर्ण जित दिलाए । बसन्तले अन्तिम दुई ओभरमा १ छक्का र १ चौका प्रहार गर्दै नेपाललाई जित दिलाएका थिए ।

डिभिजन टु मा ओमान तुलनात्मक रुपमा नेपालभन्दा कमजोर टोली हो । ओमान पहिलो खेलमा क्यानडासँग ८ विकेटले पराजित भएको थियो । तर, ओमन आईसीसी विश्व क्रिकेट लिग डिभिजन – ३ बाट बढुवा हुँदै टिभिजन टु मा पुगेको हो । त्यसैले नेपाल ओमानसँग सतर्क भएर खेल्नछ । ओमानविरुद्ध नेपालले आफ्नो कमजोर ब्याटिङलाई सुधार गर्नुपर्नेछ ।

नेपालले यसअघि ५० ओभरको खेलमा ओमनसँग १ पटक मात्रै खेलेको छ । २०१३ सालमा बर्मुडामा सम्पन्न आईसीसी विश्व क्रिकेट लिग डिभिजन – ३ को उपाधि नेपालले जित्दा लिग चरणको खेलमा ओमनलाई २८ रनले पराजित गरेको छ । त्यसपछि नेपालले पाँच बर्षपछि ओमानसँग खेल्न लागेको हो ।

६ राष्ट्र सम्मलित डिभिजन टु मा नेपालले २ अंक जोड्दै तेस्रो स्थानमा छ । समान २ – २ अंक जोडेको क्यानडा र युएई पहिलो र दोस्रो स्थानमा छ । ओमान अंकबिहीन छ । शुक्रबार ओमानलाई हराए नेपालको शीर्ष दुईमा पुग्ने सम्भावना बलियो बन्नेछ ।

नेपाललाई उच्च श्रेणीको क्रिकेटमा रहिरहन पनि डिभिजन टु महत्वपूर्ण छ । डिभिजन टु को बिजेता र उपविजेताले विश्वकप छनोटमा स्थान बनाउने छ । विश्वकप छनोट जिम्बाबेमा यही फेब्रुअरी हुनेछ । यस्तै डिभिजन टु को अन्तिम दुई टोली भने डिभिजन – ३ मा घटुवा हुनेछ ।

आईसीसी विश्व क्रिकेट लिग च्याम्पियनसिपबाट रेलिगेसन हुँदै डिभिजन टु मा झरेको हो । आठ राष्ट्र सहभागी च्याम्पियनसिपमा नेपाल सातौं भएको थियो ।