अनमोलको ‘कृ’ हेर्न १६ वर्ष मुनिका दर्शकलाई अभिभावक अनिवार्य

माघ २७, यही शुक्रबारबाट प्रदर्शनमा आउन लागेको अनमोल केसी अभिनित चलचित्र ‘कृ’ सेन्सर पास भएको छ ।

१६ बर्ष मुनिका दर्शकले अभिभावकका साथ मात्र हेर्न मिल्ने प्रमाणपत्र दिदै चलचित्र सेन्सर बोडले ‘कृ’ पास गरेको हो । बुधबार सेन्सरले दिएको प्रमाण पत्र निर्माता सुवास गिरीले सामाजिक संजालबाट सार्वजनिक गर्दै चलचित्र सेन्सर पास भएको जानकारी दिएका हुन् ।

यो चलचित्रमा अभिनेता अनमोल केसी एक्सन र क्युट गरेर दुई अवतारमा देखिएका छन् । केही चलचित्रमा लभर ब्वाइको रुपमा परिचित अनमोल यो चलचित्रबाट भने एक्सन हिरोको रुपमा चिनिने निर्माण युनिटको भनाई रहेको छ ।

सुवास इन्टरटेन्मेन्टको निर्माणमा ‘द सुपर काजोल फिल्मस्’को प्रस्तुति रहेको यो चलचित्रमा अनमोल केसी, अदीति वुढाथोकी, अनुपविक्रम शाही, कामेश्वर चौरासिया, सरोज खनाल, रुपा राना, लक्ष्मी गिरी, अमित गिरी, सुदाम लगायतका कलाकारको मुख्य भूमिका छ ।

कथा, सम्पादन र निर्देशन सुरेन्द्र पौडेलको रहेको यो चलचित्रमा चलचित्रमा चन्द्र पन्तको एक्सन, अल्मोडा राना उप्रेती र विशेष श्रेष्ठको संगीत, पुरुषोत्तम प्रधानको छायांकन, प्रदिप भारद्धाज र आशिष रेग्मीको पटकथा तथा संवाद, रेनशा वान्तवा राइको कोरियोग्राफी छ । चलचित्रका प्रोडक्शन डिजाइनर शंकर पाण्डे हुन् ।

सुवास गिरी र भूवन केसी निर्माता रहेको चलचित्रमा कमल गिरी कार्यकारी निर्माता छन् भने श्री पराजुली सह–निर्माताको रुपमा रहेका छन् ।