प्रदीप र मिरुनाको रोमान्स, फुल होइन काँडामा सँगै हिड्न तयार (भिडियोसहित)

भदौ २२ (७ सेप्टेम्बर) गतेबाट देशव्यापी प्रदर्शनमा आउन लागेको फिल्म ‘रोजी’ को पहिलो गीत रिलिज गरिएको छ । ‘फुल होइन’ बोलको गीतमा नायक प्रदीप खड्का र नायिका मिरुना मगरको फिचरिङ्ग छ । गीत इस्तानबुल, साल्टलेक र कोनियामा छायाँकन गरिएको छ ।

ब्याकग्राउन्ड स्कोरर समेत रहेका एलिस कार्कीद्धारा संगीतबद्ध गीतमा प्रताप दास र प्रविशा अधिकारीले स्वर दिएका छन् । राजेशकुमार श्रेष्ठको शब्दमा कविराज गहतराजको नृत्य निर्देशन छ ।

‘वेस्टर्न र नेपाली टोनलाई गीतमा मिश्रण गरेको छु’ गीत रचनाबारे संगीतकार कार्कीले भने, ‘रोमान्टिक र लभस्टोरी मुड अनुसारको लोकेसनले गीतलाई अझै दर्शनीय तुल्याएको छ ।’ उक्त गीतलाई युत्युबमा ३ लाख दर्शकहरुले हेरिसकेका छन् र मिरुना र प्रदीपको जोडीको पनि उत्तिकै प्रसंसा भैरहेको छ ।

निरक पौडेलको निर्देशन, अनुप सापकोटाको कथा र केदार भुषालको पटकथा छ । फिल्मले प्रेममा हुने बदला, प्राप्ती, घुम्ती, उतारचढाव र निर्दोषपनको कथा पेश गर्छ । प्रदीप, मिरुना र परमिता राणा मुख्य भूमिकामा छन् । यी तीन पात्र वरपर द्धन्द्ध घुम्छ ।

राजुविक्रम थापाको छायांकन, मित्रदेव गुरुङको सम्पादन, एलिस कार्की र अर्जुन पोखरेलको संगीत र बुद्धिलाल मगरको निर्माण नियन्त्रण छ । फिल्म गोपिकृष्ण मूभिज र आरोही इन्टरटेनमेन्टको ब्यानरमा निर्माण छ । हेर्नुस भिडियो;