देउवा सिंगापुर जाने भएपछि संवैधानिक परिषदको बैठक स्थगित

साउन २३, भावी प्रधानन्यायाधीशको नाम सिफारिस गर्न बुधबार बस्ने भनिएको संवैधानिक परिषद्को बैठक स्थगित भएको छ । प्रमुख प्रतिपक्षी दल नेपाली कांग्रेसका सभापति शेरबहादुर देउवा सिंगापुर जाने भएकाले बैठक बस्न नसकेको प्रधानमन्त्रीको निजी सचिवालयले जनाएको छ ।

देउवा दिउँसो १ बजे श्रीमति आरजुसहित उपचारका लागि सिंगापुर जाँदैछन् । यसअघि उनी गत साउन ६ गते नै सिंगापुर जाने तय भएपनि गोविन्द केसी प्रकरणमा आन्दोलन उत्कर्षमा रहेकाले त्यसवेला देउवाले आफ्नो भ्रमण स्थगित गरेका थिए ।

प्रमुख प्रतिपक्षी दलका नेता नै नभएपछि परिषद्का अध्यक्ष प्रधानमन्त्री केपी शर्मा ओलीले बैठक स्थगित गरेका हुन । यसअघि दीपकराज जोशीको नाम प्रधानन्यायाधीशमा सिफारिस भएकामा संसदीय सुनुवाइ समितिको दुईतिहाइ बहुमतले अस्वीकृत गरेको थियो ।

त्यसपछि जोशी विदामा बसेपछि अहिले ओमप्रकाश मिश्र सर्वोच्च अदालतको कायममुकायम प्रधानन्यायाधीशको भूमिकामा छन् । बैठकले भावी प्रधानन्यायाधीका लागि नाम सिफारिश गरेर संसदीय सुनुवाई विशेष समितिमा छलफलका लागि पठाउनेछ ।

यसअघि नै न्याय परिषद्को बैठकले वरिष्ठताका आधारमा मिश्र र चोलेन्द्रशमसेर जबराको नाम संवैधानिक परिषद्मा पठाइसकेको छ । बुधबार बस्ने भनिएको परिषद् बैठकमा अख्तियार दुरूपयोग अनुसन्धान आयोगमा प्रमुख नियुक्तिबारे पनि छलफल हुने बताइएको थियो ।