नेपालको लगातार दोस्रो जीत, सिङ्गापुर चार विकेटले पराजित

भदौ १७, एसीसी एसिया कप क्रिकेट छनोट प्रतियोगिता अन्तर्गत सिंगापुर विरुद्धको खेलमा नेपाल ४ विकेटले विजयी भएको छ । टस जितेर पहिले ब्याटिङ गरेको सिंगापुरले दिएको १ सय ५२ रनको लक्ष्य नेपालले २८.१ ओभरमा ६ विकेट गुमाएर पुरा गर्यो ।

पहिले ब्याटिङ गरेको सिंगापुरले ४२ ओभरमा अलआउट हुँदै १सय ५१ रन जोडेको थियो । सिंगापुर विरुद्धको ब्याटिङमा नेपालका अनिल साहले सर्वाधिक ४३ रन बनाएर भने दीपेन्द्रसिंह ऐरीले ३३ रनको योगदान दिए ।

ज्ञानेन्द्र मल्ल २९ रन बनाएर आउट हुँदा ओपनर सुवास खकुरेल १४ रनमा आउट भए । कप्ना पारस खड्को ११ रन बनाउँदा आरिफ शेखले ४ रन बनाए । यसअघि सिंगापुरका लागि लागि चेतन रामचन्द्र सूर्यवंशीले सर्वाधिक ६० रन बनाएका थिए ।

सिंगापुरलाई मध्यम स्कोरमा रोक्ने क्रममा नेपालका लागि ललित राजवंशी र सन्दीप लामिछानेले समान ३, सोमपाल कामीले २ तथा वसन्त रेग्मीले १ विकेट लिए । यसअघि खेलेका तीनवटै खेलमा सिंगापुर पराजित भएको थियो । नेपालले भने एक खेल जित्दा दुई खेलमा हार बेहोरेको छ ।

नेपाल र सिंगापुरका अलावा ओमान, युएई, हङकङ र मलेसिया सहभागी प्रतियोगिताको विजेताले एसिया कप खेल्न पाउनेछ । एसियाकपमा भारत, पाकिस्तान, श्रीलंका, बंगलादेश र अफगानिस्तान जस्ता टेस्ट मान्यता प्राप्त राष्ट्र सहभागी हुनेछन् ।