एसिया कप छनोट : हङकङविरुद्ध नेपालको खराब सुरुवात, ओपनर सुवास शुन्यमै आउट

भदौ १९, एसीसी एसिया कप छनोट चरणको अन्तिम खेलमा नेपाल र हङकङबीचकाे प्रतिस्पर्धामा नेपालकाे सुरुअात नै खराब देखिएकाे छ । टस जितेर पहिले ब्याटिङ गरिरहेको नेपालले हङकङकाे खेलमा खराब सुरुवात गरेको हाे ।

क्वालालम्पुरको यूकेएम ओभलमा भइरहेकाे म्याचमा नेपालका ओपनर सुवास खकुरेल शुन्यमै आउट भएका छन् । उनी तनबीर अफजलको पहिलाे बलमै पेभिलिएन फर्किएका हुन् । त्यस्तै कप्तान पारस खड्का पनि २९ बलमा १४ रन बनाउँदै आउट भए ।

उनलाई इसान नवाजले पेभिलिएन फर्काएका थिए । ब्याटिङ गरिरहेको नेपाललार्इ फाइनलमा पुग्नका लागि चामत्कारिक प्रदर्शन गर्नुपर्नेछ । एशिया कप छनोटको सुरुवाती दुई खेलमा पराजित भएपछि नेपालले फाइनलमा पुग्नका लागि अरुको भर पर्नुपरेको छ ।

त्यसमा आफूले ठूलो अन्तरले जितेर मात्र पुग्दैन अर्को खेलमा पनि त्यही अनुसारको नतिजा निस्कनुपर्छ । मंगलबार नेपालले हङकङलाई कम्तिमा एक सय ५० रनलाई हराएमा पनि पुग्नेछ तर सुरुअात नै खराब देखिएपछि नेपाल संकटमा परेकाे छ ।

यता युएईलाई पनि ओमानले करीव त्यस्तै नतिजाले हराउनु पर्नेछ । अंक तालिकामा ओमानको ७ अंक छ भने युएईको ६ र हङकङको ५ अंक छ ।