भारत भ्रमणमा रहेका प्रचण्डले आजबाट राजनीतिक भेटवार्ता थाल्ने

भदौ २२, छिमेकी राष्ट्र भारत भ्रमणमा रहेका पुर्वप्रधानमन्त्री तथा नेकपाका अध्यक्ष पुष्पकमल दाहाल प्रचण्डले शुक्रबारदेखि राजनीतिक भेटवार्ता सुरु गर्न लागेका छन् ।

भारत भ्रमणका लागि आफ्नो कुनै राजनीतिक एजेण्डा नरहेको दावी गरेका प्रचण्डले शुक्रबार भारतीय गृह मन्त्री राजनाथ सिंहसँग भेटवार्ता गर्नेछन् । बिहिबार भारत प्रस्थान गरेका उनले दिउसो साढे १२ बजेपछि सिंहलाई भेट्न लागेको प्रचण्डको निजि सचिवालयले जनाएको छ ।

उनले साँझ ६ः३० बजे भारतीय उद्योगी व्यवसायीसँगको अन्तरक्रियामा पनि सहभागीता जनाउने भएका छन् । भारतीय प्रधानमन्त्री नरेन्द्र मोदीसँग भने प्रचण्डले भोली भेट्ने कार्यक्रम रहेको छ ।

उनिहरुबीच भोली साढे १२ बजेपछि प्रधानमन्त्री निवासमै भेटवार्ता हुने जनाइएको छ । भोली नै दिउँसो साढे १ बजे प्रचण्डको सम्मानमा भारतका विदेशमन्त्री सुष्मा स्वराजले दिवाभोज आयोजना गरेका छन् ।

बेलुका भने इन्डिया फाउन्डेसनद्वारा आयोजित विद्वत् समारोहलाई उनले सम्बोधन गर्नेछन् । प्रचण्डको सम्मानमा हिजो साँझ भारतीय प्रधानमन्त्री नरेन्द्र मोदीका राष्ट्रिय सुरक्षा सल्लाहकार अजित डोभालले रात्रिभोज आयोजना गरेका थिए ।

दिल्ली जानुअघि पत्रकारसँग कुरा गर्दै प्रचण्डले नेपाल र भारतबीच यसअघि भएका सम्झौता र सहमति कार्यान्वयनमा जोड दिने बताएका थिए । भारतबाट फर्किएको तीन दिनपछि उहाँ अर्को छिमेकी मुलुक चीनको भ्रमणमा जाने कार्यक्रम रहेको छ । उहाँ भारतबाट २४ गते फ्सर्कनेछन् ।