महेन्द्रनगरमा फेरि आन्दोलन, थाल ठटाउँदै महिलाहरु उत्रिए सडकमा

भदौ २८, बलात्कारपछि हत्या गरिएकी कन्चनपुरकी १३ वर्षीया बालिका निर्मला पन्तको वास्तविक हत्यारा पत्ता लगाउन सरकारलाई दबाब दिन भन्दै बिहिबार कञ्चनपुरको महेन्द्रनगर बजारमा थाल ठटाएर विरोध प्रदर्शन भएको छ ।

पन्तका हत्यारालाई तत्काल सार्वजनिक गर्न माग गर्दै दबाब स्वरुप महेन्द्रनगर बजारमा थाल बजाउँदै विरोध प्रदर्शन गरिएको छ । खाना खाने थाल र चम्चासहित सडकमा उत्रेका महिलाले घटना घटेको झन्डै २ महिना बित्न लाग्दासम्म वास्तविक हत्यारा पत्ता लगाउन नसकेको भन्दै सरकारको आलोचना गरे ।

१ नम्बर गल्लीबाट निस्किएको विरोध र्‍याली महेन्द्रनगर बजारको परिक्रमा गर्दै मदनचोकमा गएर धर्नामा परिणत भएको थियो । न्यायका लागि गठित दबाबमूलक संघर्ष समितिले घटनाको लामो समय भइसक्दा पनि हत्यारा पत्ता नलागेपछि शान्तिपूर्ण आन्दोलनलाई फेरि निरन्तरता दिएको जनाएको छ ।

घटनाको निष्पक्ष छानबिन गरी दोषीलाई तत्काल कानुनी दायरामा ल्याउनुपर्ने माग उनीहरुले गरेका छन् ।

भीमदत्त नगरपालिका–२, खोल्टीकी पन्त गत साउन १० गते घरबाट साथीको घर जान निस्किएकी थिइन् । त्यसपछि आफ्नो घर नफर्किएकी उनको शव हत्या गरेर फालिएको अवस्थामा साउन ११ गते स्थानीय उखुबारीमा फेला परेको थियो ।