पप्पुले बनाएको बागमतीको पुलमा त्रुटि

विवादित पप्पु कन्स्ट्रक्सन कम्पनीलाई कारवाही गर्न संसदीय समितिले सरकारलाई निर्देशन दिएको छ ।

संघीय संसदको विकास तथा प्रविधि समितिको शुक्रबार सिंहदरबारमा बसेको बैठकले काठमाडौंको तीनकुनेस्थित बागमती नदीमाथिको पुल निर्माणमा गम्भीर त्रुटि भेटिएको निष्कर्ष निकाल्दै ठेकेदार कम्पनी पप्पु कन्स्ट्रक्सनलाई कार्वाही गर्न सरकारलाई निर्देशन दिएको हो।

उपत्यका सडक विस्तार आयोजनाको निर्देशन विपरित गुणस्तरहिन काम गरेको पाइएकाले सो कम्पनीलाई कार्वाही गर्न सरकारलाई निर्देशन दिनु परेको समितिकी सभापति कल्याणी खड्काले जानकारी दिइन्। केहि समयअघि समितिले सो पुलको स्थलगत निरीक्षण समेत गरेको थियो।

समितिले पुलको पुनः डिजाईन नगरी काम अघि नबढाउन पनि सरकारलाई सचेत गराएको छ । बैठकमा समितिका सदस्यहरुले पुलको निर्माण कार्यमा ढिलाई गर्न नहुनेमा जोड दिएका थिए । दिएको निर्देशन समेत पालना नगर्ने तथा पहुँच र प्रभावको आधारमा आफूखुसी गर्ने सो कम्पनीलाई कार्वाही गर्नुको विकल्प नरहेको समितिको निष्कर्ष छ ।