Nepal's First Video FM

चाैरासी पूजाकाे साटाे विद्यालयलाई ११ राेपनी जग्गा दान

69

अर्घाखाँची – पाणिनी गाउँपालिका २ पोखराथोक रयलेका ८४ वर्षीय वृद्धले चौरासी पूजाकाे सट्टा विद्यालयलाई ११ रोपनी जग्गा दान गर्नुभएको छ ।

चौरासी पूजामा गरिने खर्चभन्दा विद्यालयमा गरिने दानले बालबालिकाको पठनपाठनमा सहयोग पुग्ने भन्दै रविलाल सार्कीले विद्यालयलाई जग्गा दान गर्नुभएको हो ।

उहाँले पाणिनि गाउँपालिका ३ को खिदीममा रहेको ११ रोपनी जग्गा र पाँच हजार रुपैयाँ पाणिनि गाउँपालिका २ पोखराथोकको रयलेमा रहेको चित्ररम्भा आधारभूत विद्यालयलाई प्रदान गर्नुभएको हो ।

आफूले दिएको जग्गाले विद्यालयको श्रीवृद्धिमा सहयोग पुग्ने उहाँले बताउनुभयो । ‘मैले गरेको काम सबैका लागि प्रेरणा हुनेछ । अरुलाई पनि विद्यालयलाई दान दिने र गाउँको विद्यालयलाई राम्रो बनाउन गाउँले नै लाग्नुपर्ने बानीको विकास हुनेछ’, सार्की भन्नुहुन्छ ।

विद्यालयमा एक कार्यक्रमका बीच जग्गाको लालपुर्जा सार्कीले वडाध्यक्ष नेत्रप्रसाद भट्टराई र विद्यालय व्यवस्थापन समितिका अध्यक्ष गुणनिधि गैरेलाई हस्तान्तरण गर्नुभएको हो ।

‘उहाँले मन ठूलो बनाएर विद्यालयलाई जग्गा दान गरेर समाजकै उदाहरणीय काम गर्नुभएको छ । यसबाट हामी सबैले सिक्न जरुरी छ’, वडाध्यक्ष नेत्रप्रसाद भट्टराईले भन्नुभयो, ‘विद्यालयको विकासमा यो जग्गा दानले उल्लेखनीय भूमिका खेल्नेछ ।’

You might also like

Comments are closed, but trackbacks and pingbacks are open.