Nepal's First Video FM

सन् २०२६ मा भारत विश्वको चौथो ठूलो अर्थतन्त्र बन्न सक्ने

79

सेन्टर फर इकोनोमिक एन्ड बिजेनस रिसर्चले हालै सार्वजनिक गरेको एक रिपोर्टले सन् २०२६ मा भारतले जर्मनीलाई पछाडि छाड्दै विश्वकै चौथो ठूलो अर्थतन्त्र बन्ने प्रक्षेपण गरेको छ ।

रिपोर्टमा सो समयमा भारतको कूल ग्राहस्थ उत्पादन पाँच ट्रिलियन डलरसम्म पुग्ने बताइएको छ । यद्यपि, नरेन्द्र मोदी नेतृत्वको सरकारले यो लक्ष्य २०२४ मा नै पूरा गर्ने बताउँदै आएको छ ।

‘वर्ल्ड इकोनोमिक लिग टेबल २०२०’ शीर्षकमा छापिएको रिपोर्टमा भनिएको छ, ‘भारतले सन् २०१९ मा निर्णायक रुपमा विश्वको पाँचौ ठूलो अर्थतन्त्र बन्न फ्रान्स र बेलायतलाई पछ्याइरहेको छ । सन् २०२६ मा भारत विश्वकै चौथो ठूलो अर्थतन्त्र बन्ने आशा छ र सन् २०३४ मा जापानलाई उछिन्दै विश्वको तेस्रो ठूलो अर्थतन्त्र बन्न सक्नेछ । आगामी १५ वर्षमा जापान, जर्मनी र भारतबीच तेस्रो स्थानका लागि प्रतिस्पर्धा हुनेछ ।’

यद्यपि, भारतको अर्थव्यवस्था अहिले जुन स्थितिमा रहेको छ र अगाडि पनि त्यही स्थितिमा रह्यो भने लक्ष्यसम्म पुग्न सजिलो हुनेछैन । हालैमात्र रिजर्व बैङ्कका पूर्व गभर्नर सी रंगराजनले वर्तमान वृद्धि दरबाट पाँच ट्रिलियनको लक्ष्य हासिल गर्न कठिन हुने टिप्पणी गरेका थिए ।

यही वर्ष अगस्तमा विश्व बैङ्कको सन् २०१८ को र्याङ्किङमा भारतको अर्थव्यवस्था छैटौँ स्थानबाट खस्केर सातौँ नम्बरमा पुगेको थियो ।

सन् २०१७ मा र्याङ्किङमा भारतको अर्थव्यवस्थाको आकार २.६५ ट्रिलियन डलरको थियो तर सन् २०१८ मा यो बढेर २.७३ ट्रिलियन डलर पुगेको थियो । तैपनि भारत एक स्थान तल खस्किन पुगेको थियो ।

सन् २०१८ मा फ्रान्स र बेलायतको अर्थव्यवस्था भारतको तुलनामा थप मजबुत बनेको थियो । यसअघि भारतले बेलायतलाई पछि छाड्दै पाँचौ नम्बरमा पुग्ने बताइएको थियो । तर बेलायत र फ्रान्सले भारतलाई सातौँ नम्बरमा धकेलिदियो ।

सन् २०१८ मा बेलायतको अर्थतन्त्र २.६४ ट्रिलियन डलरबाट २.८४ ट्रिलियन डलर पुगेको थियो भने फ्रान्सको २.५९ ट्रिलियन डलरबाट २.७८ ट्रिलियन डलर पुगेको थियो ।

२० ट्रिलियन डलरसहित अमेरिकाको अर्थव्यवस्था पहिलो नम्बरमा रहेको छ भने १३.६१ ट्रिलियन डलरसहित चीन दोस्रो नम्बरमा रहेको छ ।

४.९७ ट्रिलियन डलरसहित जापान तेस्रो नम्बरमा र जर्मनी ३.९९ डलरसहित चौँथो नम्बरमा रहेको छ ।

You might also like

Comments are closed, but trackbacks and pingbacks are open.