दाङमा पुगेका एमाले नेता पौडेलको यस्तो अभिब्यक्ति

माघ 10 , नेकपा एमालेका उपमहासचिव विष्णु पौडेलले प्रदेश ५ को राजधानी कहाँ राख्ने भन्ने विषयमा प्रदेशसभाले विवेकसम्मत निर्णय गर्ने बताएका छन् ।राष्ट्रियसभाको उम्मेदवारी दर्ता एमालेको टोलीसँगै दाङको घोराही आएका पौडेलले सञ्चारकर्मीहरुसँग सरकारले आफ्नो जिम्मेवारी अनुसार अस्थायी मुकाम तोकेकाले यसमा विरोध गर्नु आवश्यक नभएको बताए ।

‘अहिले भएको निर्णय अस्थायी हो, अब प्रदेशसभाको दुई तिहाई बहुमतले अन्तिम निर्णय गर्छ,’ उनले भने, ‘अस्थायी मुकाम तोकेको विषयमा अनावश्यक विरोध गर्दा प्रदेशसभाको इज्जत र मर्यादाका लागि सुहाउदैन ।’

प्रदेशको राजधानीको टुंगो लगाउने जिम्मा जनताको मतबाट विजयी भएका प्रदेश सांसदहरुको भएकाले यसमा टिप्पणी गर्नुको कुनै औचित्य नभएको पौडेलको भनाइ छ । भौगोलिक रुपमा दाङको पनि रुपन्देहीको पनि पक्षमा दुई तिहाई पुग्दैन कसरी निर्णय हुन्छ त ? भन्ने सञ्चारकर्मीहरुको प्रश्नमा उनले भने- ‘तपाईलाई प्रदेश सांसदहरुले अगि्रम जानकारी दिइसक्नुभएको छ र ? प्रदेश सभाका सांसदरु जिम्मेवार हुनुहुन्छ, उहाँहरुले विवेकसम्मत निर्णय गर्नुहुन्छ ।’

राष्ट्रिय सभाका उम्मेदवारहरुलाई लिएर नेता पौडेल, प्रदेश ५ का एमाले संसदीय दलको नेता शंकर पोख्रेललगायतका नेताहरु निर्वाचन कार्यालय पुगेका थिए ।रुपन्देहीबाट प्रतिनिधिसभामा निर्वाचित पौडेलले समेत अस्थायी मुकाम गृहजिल्लामा तोक्नका लागि दवाव दिएको आरोप लाग्ने गरेको छ । अस्थायी मुकामको माग गर्दै दाङमा भएको आन्दोलनमा उनीविरुद्ध नारावासी समेत भएको थियो ।