प्रहरी हुँ भन्दै लुटेर हिँड्ने दुई जनालाई भरतपुरबाट पक्राउ

फागुन ११, आफूलाई सादा पोशाकको प्रहरी हुँ भन्दै लुटेर हिँड्ने दुई जनालाई भरतपुरको जागृतिचोकबाट शुक्रबार प्रहरीले पक्राउ गरेको छ ।

जिल्ला प्रहरी कार्यालय चितवनका प्रवक्ता प्रहरी नायब उपरीक्षक प्रभुप्रसाद ढकालका अनुसार पक्राउ पर्नेमा भरतपुर महानगरपालिका वडा नं १२ बस्ने १७ वर्षीय आशिष मगर र भरतपुर महानगरपालिका वडा नं ११ बस्ने २० वर्षीय सुजन गुरुङ रहेका छन् ।

उनीहरुले फागुन ४ गते राति भरतपुर महानगरपालिका वडा नं ११ निवासी नारायण धिताललाई विशाल चोकमा आफूहरु प्रहरी भएको बताउँदै जाँच गर्ने भन्दै नगद १० हजार र मोबाइल सेट लुटेको प्रहरीले जनाएको छ ।

धिताल काठमाडौँबाट घर फर्कने क्रममा उनीहरुले लुटेको प्रहरीले जनाएको छ । उनीहरुले नारायणगढमा रहेको पोखरा बसपार्कमा पनि होटलमा धम्काउने काम गरेको कार्यालयले जनाएको छ ।

खुकुरी प्रहार गरी फरार अभियुक्त पक्राउ

यस्तै, खुकुरी प्रहार गरी घाइते बनाएर फरार रहेका भरतपुर-२७ का हेमबहादुर थापालाई प्रहरीले भरतपुर-१० बाट शुक्रबार पक्राउ गरेको छ । उनले माघ १५ गते वीरेन्द्र क्याम्पस अगाडि र २४ गते दीपेन्द्र चोकमा शंकरदेव ज्ञवालीलाई खुकुरी प्रहार गरी घाइते बनाएका थिए । रासस