पहिरोले सिद्धार्थ राजमार्ग अन्तर्गत बुटवल–तानसेन सडकखण्ड अवरुद्ध

३ साउन , काठमाडौँ : गए राति खसेको पहिरोले सिद्धार्थ राजमार्ग अन्तर्गत बुटवल–तानसेन सडकखण्ड अवरुद्ध भएको छ।

पाल्पाको तानसेन नगरपालिका–८ मा पर्ने गौडेपुल नजिकै गए राति पहिरो खसेको हो । पहिरो खसेपछि सडक पूर्णरुपमा अवरुद्ध भएको जिल्ला प्रहरी कार्यालय पाल्पाले जनाएको छ।

उक्त ठाउँमा हिजो खसेको पहिरो हटाउन नपाउँदै पुनः पहिरो गएको हो । पहिरोले लु १ क ११७५ नम्बरको ट्रक पुरेको छ।

पहिरो पन्छाउने काम शुरु गरिएको तर ढिस्को खस्ने क्रम जारी रहेकाले सडक खुल्न समय लाग्ने जिल्ला प्रहरी कार्यालय पाल्पाका प्रहरी नायब उपरीक्षक मदन गिरीले बताए।