कोरोना भाइरस ‘चमेरामा दशकौँदेखि थियो

कोभिड–१९ रोगको कारक मानिएको कोरोना भाइरस (सार्स–कोभ २) दशकौँदेखि चमेरामा रहँदै आएको हुन सक्ने देखाएको छ । हालै गरिएको अनुसन्धानको क्रममा सार्स–कोभ २ भाइरस अहिले पत्ता लाग्नुभन्दा ४० देखि ७० वर्षअघि नै चमेरामा आएको हुन सक्ने बताइएको छ । यो अवधिमा उक्त भाइरस चमेरामा नै रहेको र अहिले मानिसमा सरेको हुन सक्ने बताइएको छ ।

यसअघि शोधकर्ताहरुले यो भाइरसको उत्पत्तिको विषयलाई लिएर अफवाहहरु पनि चलिरहेको उल्लेख गरेका छन् । विशेषगरी यो भाइरस चिनियाँ प्रयोगशालामा निर्माण गरिएको हुन सक्ने भन्दै चीनमाथि अमेरिकाले आरोप लगाएको थियो । अहिलेको अध्ययनले उक्त अफवाहलाई अझै कमजोर साबित गरेको छ ।

उनी भन्छन्, ‘यसको अर्थ मानिसलाई संक्रमित गर्ने भाइरस केही समयदेखि मात्र देखिएको थियो ।’

‘हामीले यो भाइरस कहाँ र कसरी मानिसमा आयो भन्ने पत्ता लगाउनु जरुरी छ । हामीलाई अहिले यसको आनुवंशिक भाइरस चमेरामा पाइन्छ भन्ने थाहा भयो भने हामीले यसलाई अझ राम्रोसँग नियमन गर्न सक्छौँ’, उनले थपे ।

रोबर्टसनका अनुसार पछिल्लो समय मानिसहरुमा आइरहेका नयाँ रोगहरुको बारेमा थप जाँच गर्नु जरुरी छ । साथै भविष्यमा उत्पन्न हुन सक्ने महामारी नियन्त्रणको लागि धेरैभन्दा धेरै चमेराहरुको नमुना संकलन गरी अध्ययन गरी अनुसन्धान हुनुपर्ने उनको भनाइ छ ।

उनी भन्छन्, ‘यदि यो भाइरस दशकौँदेखि थियो भने उनीहरुलाई अर्को कुनै जनावरमा पनि यो भाइरस फैलाउने पर्याप्त मौका मिल्यो होला ।’

यो अध्ययनको लागि शोधकर्ताहरुले सार्स–कोभ २ भाइरसको जेनेटिक कोडको मिलान योसँग मिल्दोजुल्दो चमेरामा पाइने आरएटीजी–१३ सँग गरिएको थियो । शोधकर्ताहरुले यी दुवैको पूर्वज एकै रहेको पाएका थिए । तर, इभोल्युसनको प्रक्रियामा दशकौँ पहिला एकअर्काबाट छुट्टिएका थिए ।

युनिभर्सिटी अफ रिडिङका प्राध्यापक मार्क पेजल यो अध्ययनले अहिले मानिसमा संक्रमण फैलाइरहेको भाइरस ४० देखि ७० वर्षसम्म चमेरामा रहेको तर अहिलेसम्म पत्ता लगाउन नसकिएको बताएका छन् । यद्यपि उनी यो अध्ययनमा सहभागी भने थिएनन् ।

उनी भन्छन्, ‘यो अध्ययनबाट यो कुरा थाहा हुन्छ कि जनावरबाट मानिसमा हुने संक्रमणको दायरा कति ठूलो छ । अहिले पनि मानिसहरुमा सर्न सक्ने धेरै भाइरस जनावरको शरीरमा भएको र यो हामीलाई थाहा नभएको पनि हुन सक्छ ।’