सुवास नेम्वाङका छाेरा सुहाङ भन्छन्– बुबाका धेरै काम पूरा गर्न पार्टीले आत्मबल देओस्

काठमाडौँ, हृदयाघातका कारण हालै निधन भएका एमाले उपाध्यक्ष सुवासचन्द्र नेम्वाङका कान्छा छोरा सुहाङ नेम्वाङले बुबाले गर्न बाँकी रहेका काम पूरा गर्न आफूलाई पार्टीले आत्मबल दिने विश्वास व्यक्त गरेका छन् ।

नेम्वाङप्रति श्रद्धाञ्जली अर्पण गर्न बालुवाटारस्थित निवास पुगेका विष्णु पौडेलसहितका एमाले नेताहरूप्रति आभार प्रकट गर्दै उनले बुबाले मुलुकका लागि धेरै काम गरेको र अझै धेरै काम गर्न बाँकी नै रहेको उल्लेख गरे ।

‘हाम्रो परिवारलाई र नेपाललाई ठूलो क्षति भएको अवस्थामा श्रद्धाञ्जली र आत्मबल प्रदान गर्न आउनुभएकाेमा म र हाम्रो परिवार एकदमै आभारी छौँ’, सुहाङले भने, ‘उहाँ (बुबा सुवास नेम्वाङ)ले गर्नुभएका र अझै गर्नुपर्ने धेरै कामहरूको लागि हजुरहरूले साथ र आत्मबल प्रदान गर्नुहुनेछ ।’