चोरीको आरोपमा सरस्वती क्लबका फुटबलर पूर्वकप्तान श्रेष्ठ समातिए

वैशाख ६, नेपालको सरस्वती युथ क्लब ‘ए’ डिभिजन लिग २०१३–१४ टोलीका प्रमुख सदस्य दिपेश श्रेष्ठ चोरीको आरोपमा पक्राउ परेका छन् ।

मोबाइल, ल्यापटप लगायतका सामग्री चोरी गरेर विक्री वितरण गर्ने कारोबारी सक्रिय रहेको सूचनाका आधारमा महानगरीय प्रहरी परिसर काठमाडौंको टोली श्रेष्ठ कहाँ पुगेका थिए ।

प्रहरीले बुधबार काठमाडौं–६, रेम्बोडाँडाबाट बाच्छो भनिने सुवास खड्कालाई शंकास्पद अवस्थामा भेटेको थियो । उनलाई नियन्त्रणमा लिएर सोधपुछ गर्दा साथीसँग मिलेर चोरीका सामान किनबेच गर्ने गरेको बयान दिए । चोरीका सामान फुटबलर श्रेष्ठको कोठामा लुकाएर राख्ने गरेको प्रहरीले बताए ।

श्रेष्ठको कोठाबाट विभिन्न ब्रान्डका ३३ वटा मोबाइल, दुई वटा आइफोन, ३ वटा पावर बैंक, सोनी कम्पनीको ३२ इन्जको टिभी एक थान, ५ वटा ल्यापटप लगायतका सामग्री खनतलासीका क्रममा बरामद भएको छ । हाल प्रहरी हिरासतमा रहेका श्रेष्ठले चोरीमा संलग्न भएको स्वीकार गरेका छन् ।

चोरीका सामानहरु फेसबुक ग्रुप र अनलाइन किनबेच गर्ने वेवसाइटमार्फत विक्री वितरण गर्दै आएको बयान दिएका छन् । पक्राउ परेका दुवै जनामाथि मुलुकी ऐनको चोरीको महल बमोजिम सजाय हुने परिसरका प्रमुख प्रहरी वरिष्ठ उपरीक्षक (एसएसपी) विश्वराज पोखरेलले जानकारी दिएको छ । news24