२५ लाखको चिट्ठा परेको भनी ठगी गर्ने गुल्मीका एक युवक पक्राउ

जेठ ३, ‘आइएमओ कल’ मार्फत चिट्ठा परेको झुठो खबर सुनाएर रकम ठगी गर्ने एक युवकलाई प्रहरीले पक्राउ गरेको छ ।

बागलुङ नगरपालिका–१ रामरेखा बस्दै आएकी ३५ वर्षीया विष्णु नेपालीलाई २५ लाख चिट्ठा परेको भनी ठगी गर्ने गुल्मीको मालिका गाउँपालिका–६ का २८ वर्षीय पोमबहादुर खत्रीलाई प्रहरीले नियन्त्रणमा लिएको हो ।

खत्रीले चिट्ठा परेको २५ लाख पाउन नेपालीलाई एक लाख गुल्मीमा रहेको प्रभु बैंकको खातामा जम्मा गर्न भनेका थिए जसमध्ये नेपालीले पहिलो किस्ता बापतको ३५ हजार बैंकमा जम्मा गरिसकेको थियो ।

खत्रीले दोस्रो किस्ता रकम माग गरेपछि आफू ठगिएको हुनसक्ने आशंकामा नेपालीले जिल्ला प्रहरी कार्यालय बागलुङमा उजुरी दिएका थिए । उजुरीका आधारमा जिल्ला प्रहरी कार्यालय गुल्मीमार्फत खत्रीलाई नियन्त्रणमा लिइएको बागलुङका प्रहरी नायब उपरीक्षक विश्वराजसिंह थापाले बताए ।